Pyetje klasike e një interviste pune dhe përgjigja më e mirë. Pyetja 1

Kur vjen fjala tek intervista e punës të gjithë frikësohemi apo na kapin emocionet. Si do ia dal? Si do përgjigjem? A do jenë përgjigjet e mia të duhurat? Këto janë disa nga pyetjet që na mbajnë pezull dhe shpeshherë kjo frikë na penalizon. Por, rekrutuesit i qëndrojnë shumë besnikë këtyre 3 parimeve gjatë intervistës, të cilat duhet t'i keni gjithmonë parasysh:

• Të njohë kandidatin i cili mund të jetë i intervistuari ideal për pozicionin përkatës të punës
• Të gjykojë se cili do të përshtatet më mirë me vendin e punës bazuar në eksperiencë dhe temperament
• Të identifikojë cili person e do vërtet punën dhe mund ta zhvillojë atë

Një gabim tipik i shumë kandidatëve është se mendojnë se të flasësh shumë në një intervistë i favorizon, ndërkohë që ndodh komplet e kundërta. "Të flasësh shumë nuk do të thotë zgjuarsi, dhe as sukses." - thotë shkrimtarja Wendy Enelow. Sot ju njohim me një nga pyetjet më tipike dhe këshillën për përgjigjen më të mirë.

1. Mund të më flasësh pak për veten?

Shumë intervistues e nisin në këtë mënyrë jo vetëm për të mbledhur informacion mbi ju, por edhe për të kuptuar qëllimin, mënyrën e të transmetuarit të informacionit dhe aftësitë komunikative. Nëse ju filloni t'i flisni për fëmijërinë, shkollën, hobit, karrierën e hershme, pëlqimet personale, atëhërë intervistuesi me vetëm një pyetje do të kuptonte që nuk jeni një konkurrent i fortë për atë pozicion pune. Nuk duhet t'i përmbahemi me përpikmëri pyetjes dhe aq më tepër një devijim nga tema për 2-3 minuta do të përbënte problem. Ky ëshë një test që po kaloni dhe duhet jo vetëm t'i përmbaheni kohës, e cila nuk është shumë e gjatë, por gjithashtu ju duhet të flisni për ato eksperienca të cilat në një mënyrë apo në një tjetër tregojnë se sa i aftë do të jeni të përballoni dhe të përshtateni me punën për të cilën po intervistoheni. Bëni prova në shtëpi për këtë përgjigje dhe konsultohuni me të afërmit tuaj. Fokusojeni bisedën gjithnjë tek arritjet dhe jini sa më konçizë. "Miku juaj për punë dhe karrierë" - duapune.com